هل مكان الجزمة فعلاً يمنع الرزق؟ الحقيقة الصادمة اللي لازم تعرفها!
بيقولك… أوعى تسيب الجزمة عند باب البيت!
ليه؟ عشان كده هتجذب الفقر!
يعني إيه؟ أرجع من الشارع وأرمي الجزمة من البلكونة؟
ولا أتصل بالدليفري يجيب لي جزمة جديدة كل مرة؟
المنطق راح فين؟!
طيب سؤال بسيط… هل ربنا بيرزق الناس حسب مكان الحذاء؟
الآية واضحة:
ومن يتق الله يجعل له مخرجا ويرزقه من حيث لا يحتسب.
مافيهاش جزمة، ولا باب شقة، ولا مدخل بيت.
اللي بيرزقك هو ربك… مش موقع النعل.
آه، الترتيب والنظافة حاجة حلوة… بتأثر على نفسيتك، بتساعدك تبقى هادي ومنظم،
لكن… ما تقوليش إنك مش لاقي شغل عشان الجزمة كانت شمال مش يمين!
ربنا مش بيربط الرزق بالحاجات دي، بيربطه بتقواك، نيتك، سعيتك، وحسن ظنك بيه.
بس برضه لازم نعترف بحاجة مهمة.
أنت ممكن فعلاً تبقى بتعطل رزقك،
بس مش بمكان الجزمة… لا،
بأفكارك، مشاعرك، ومعتقداتك.
لما تعيش طول الوقت في خوف، أو إحساس بعدم الاستحقاق،
عقلك بيبدأ يفلتر الواقع.
ما يلاحظش الفرص، ما يفتحش لك أبواب جديدة.
يعني ممكن تكون الفرصة قدامك فعلاً، بس عقلك مش شايفها!
وده بيخليك تحس إن “الرزق متعطل”… وهو في الحقيقة أنت اللي مش جاهز تستقبله.
خد بالك:
الجزمة ملهاش ذنب،
الذنب في المعتقد اللي خلاك تصدق إنها ممكن تمنع رزقك.
نضف مكانك؟ آه.
نضف معتقداتك؟ أهم.
خلي نيتك صافية، وقلبك مفتوح، واتكل على الله مش على مكان الحذاء.
لأن الرزق… من عند الكريم، مش من عند الباب.
خليني اقولك معلومه ممكن تكون من اهم معلومات حياتك
في ناس كتير بتقول: “أنا مؤمن بالله، وبصلي وبعمل كل حاجة… بس ليه ربنا مش بيكرمني؟”
وهنا أحب أفكرك بحاجة ربنا قالها في القرآن: “وكان حقًا علينا نصر المؤمنين”
بس خلي بالك… “المؤمنين” هنا مش معناها بس اللي بيقول أنا مؤمن بربنا وخلاص… الإيمان مش بس في اللسان، الإيمان هو اللي انت مصدقه جوه قلبك وبتعيشه كل يوم.
يعني لو إنت مؤمن إن الفقر قدرك، وإنك دايمًا قليل… أو مؤمن إن الرزق مربوط بفلان أو مكان أو واسطة… فده فعليًا بقى إيمانك، وربنا بينصرك على قد إيمانك ده، لأن قانون الحياة كده.
وربنا بيقولنا: “فما ظنكم برب العالمين؟”
يعني ربنا بيسألك: بتتوقع مني إيه؟ شايفني إزاي؟
لو شايف إن ربنا كبير وقدير وكريم، وبتصدق ده بجد، حياتك هتتفتح. ولو إيمانك من جوه بيقول “أنا مش نافع”، أو “الرزق صعب”… للأسف، هتعيش كده.
فالسؤال هنا مش: “هل تؤمن بالله؟”
السؤال هو: بتؤمن بإيه جواك؟
لأن اللي بتؤمن بيه هو اللي هيتحقق ليك.
