كلنا تقريبًا اتزرع جوانا من وإحنا صغيرين فكرة إن “الفقر شرف”، وإن اللي معاه فلوس كتير غالبًا أكيد عمل حاجة غلط، وإن الغِنى نفسه مش نِعمة، بل بالعكس، لعنة ممكن تفسد الأخلاق.

المشكلة مش بس في الكلام، المشكلة إن البرمجة دي دخلت جوانا وإحنا مش واخدين بالنا، من ناس بنحبهم وبنثق فيهم:

أهلنا، مدرسينا، وحتى الشيوخ والدُعاة أحيانًا (من غير قصد).

أمثلة على البرمجة اللي سمعناها: من الأهل: “احنا ناس على قد حالنا”

“الفلوس ما بتجيش غير بالذل”

“الفلوس وسخ الدنيا”

“مش لازم تعيش غني.. أهم حاجة تعيش مستور”

“اللي عايز الفلوس كتير ده طماع”

كل الجُمل دي مش بس كلمات، دي قوالب بتبرمج بيها الطفل، وبيتزرَع فيه خوف من الطموح، وخوف من النجاح، وخوف من إنه يطلب أكتر.

من المدرسة: “فلان ده ابن ناس غنية، مايعرفش قيمة الحاجة”

“إحنا ناس بسيطة، مش زي ناس تانية”

المدرسين نفسهم كانوا ساعات بيكلموا الطلبة الأغنياء بنظرة دونية، أو بالعكس، يجاملوا الأغنياء بطريقة تخليك تِكرَه الغِنى.

من الدين المغلوط: “الفقر يُدخِل الجنة” (اتقالِت كأنها حديث، وهي مش كده أصلًا!)

“الغني مش هيدخل الجنة إلا لما الجمل يدخل في سم الخياط” (والتفسير الحقيقي الحديث ده أعمق بكتير)

“كل الأغنياء حرامية”

الحقيقة؟ الإسلام عمره ما كان ضد الغنى.

بل فيه صحابة كانوا أغنى من أغنياء اليوم، زي عبد الرحمن بن عوف، وكانوا بيصرفوا على الجيوش من مالهم.

لكن إحنا اتعلمنا نسخة تخوفك من المال وتخليك تفتكر إنك لما تشتغل وتكسب، تبقى شخص مش روحي، أو بعيد عن ربنا.

إزاي الكلام ده أثّر علينا؟ بقينا نحس بالذنب لما الفلوس تزيد.

لما ننجح، نكتم فرحتنا عشان الناس ماتقولش “شايف نفسه”.

بقينا نرفض نطلب أجر عالي لأننا “مش طماعين”.

لو جاتلك فلوس فجأة، تلاقي نفسك بتصرفها كلها كأنك مش مستحقها.

بتقول على الناس اللي عندهم فلوس: “أكيد سرقوا”، وده يخلي عقلك الباطن يبعدك عن الغنى عشان متبقاش شبههم!

طيب نعمل إيه بقى؟ أول خطوة في التحرر من البرمجة دي هي إنك تعترف إنها موجودة، وإنك مش غلطان، لكنك كنت متبرمج، زَيّك زَيّ الملايين.

بس دلوقتي انت واعي.

ابدأ ترجع تسمع الجُمل دي في دماغك لما تطلع، وتسأل نفسك:

“هل دي جملة حقيقية، ولا برمجة قديمة؟”

وكل مرة تختار إنك تفكر بشكل جديد، عقلك هيبدأ يشتغل لصالحك مش ضدك.

مثال توضيحي: بدل ما تقول:

“الفلوس وسخ الدنيا”

قول:

“الفلوس أداة، وأنا اللي بحدد أستخدمها في الخير ولا لأ”

بدل ما تقول:

“الغني مستحيل يكون طيب”

قول:

“الطيب ممكن يكون غني، والشرير كمان، الفلوس مش مقياس للنية”